Wednesday, April 11, 2018

MARA REIH CHÂ ROZIE DOPA

MARA  REIH  CH  ROZIE  DOPA

~ A. Zakia, Head Teacher (Rtd.)
Siaha Vaihpi.

Mara reih châ rozie liata eima zi awpah biepipa (principle) y ta: vowel hawhrawh parosazie â hnai chaipa liata ‘h’ bai lymâ awpah tahpa châ ta. Pakah âpa ta ‘â’ tahpa parosana lia maih ta ‘â’ a chô khupa he hmâh awpah a châ. Chyhsa moh nata khih moh, sawhkhâ ta â pyh hapa deikua pahly vei.

Mara reih he aony chhâh thôh ta parosa pi ta, vowel â sâhpa nata a liahrypa eima parosapa liata ngiana khâpa hmah bai leipa pi ta. Vowel â hnai chaipa ta eima parosapa maih liata ‘h’ eima baipa a châ. Vowel â hnai chaipa liata ‘h’ eima baina dâh cha solfa, doh, ray, me ta pamosa sih la:

Mohchho: Solfa aony: Bietlohpa ta hmâzie:
Sa = m = sa (vaosa) eima nie. (Noun)
Sa = r = saw a sa (Verb)
Sah = d = Ti eih a sah (Adjective)

= m = A sâ a seih kaw. (Noun)
= r = Dawhty ta a sâ a tai. (Noun)
Sâh = d = sâh ama nie. (Noun)
= vao a sâh. (Verb)
= Thokô â sâh kaw. (Adjective)

Vowel â hnaipa ta parosapa, ‘doh’ level (tlupa) maih liata ‘h’ bai lymâ awpah a châ.

Mara reih mohchho rozie â do leipazy : Mohchho rozie â dopazy:

Alô-ô - Alôh-ôh
Awhnie-ô - Awhhnie-ôh
Beihaka - Beihhâhkâh
Chhôhmo - Chhôhhmoh
Chhohna - Chhohhna
Chhihro-ô - Chhihroh-ôh
Dahaw - Dâhhaw
Dawhlasa - Dawhhlasa
Eihra - Eihhrâh
Hrahnao - Hrâhhnao
Hrahrao - Hrâhhraoh
Hiahri - Hiahhri
Hrohra - Hrohhrâ
Hohia - Hohhiah
Khaohrei - Khaohhrei
Kheihawpa - Kheihhawhpa
Kheihlu - Kheihhluh
Kheihlô - Kheihhlôh
Lohei - Lohheih
Lôhia - Lôhhiah
Lôhaw - Lôhhawh
Lôhratlô - Lôhhrâtlô
Mohô - Mohhôh
Myuhneitupa - Myuhhneituhpa
Napa - Nahpâ
Nawhly - Nawhhly
Nohlao - Nohhlao
Nohro - Nohhro
Nohaw - Nohhawh
Rahma - Râhhmâh
Rohia - Rohhiah
Rohna - Rohhnâh
Sahma - Sahhma
Saho - Sâhho
Sahria - Sâhhria
Seicheihra - Seihcheihhrâh
Vyhai - Vyhhai
Zahnia - Zâhhnia
Maisa - Maihsâh
Rôna - Rôhnah


Vowel hawhrawh parosazie â hnai chaipa, ‘doh’ level (tlupa) liata ‘h’ baipa heta mohchho reizie ao parosana dâh a do ta. Rozie pachu dâh dopa a châ hra.

Tlaikao reih chhao he reih parosazie chi palih (4) hnei ei ta. A pachhupa ta ama parosapa maih, â sâhpa zy, a liah-ryhpa zy, â hnaipa nata â hnai chaipa liata vowel hawhrawh zydua liata ‘h’ ama bai hra. Consonats ‘l’ nata ‘r’ liata chhao ‘h’ ama bai hra. Mara reih hlâta Tlaikao reih liata ‘h’ a hluh via syulyu. Tlaikao reih liata ‘h’ ama baina dâh achyhta palâsa sih la.

He hawhta:

Buhhum, bawlhhlawh, chhiahhlawh, hrilhhai, helhhawlh, hawihhawm, kaihhnawih, kaihparh, kaihhruai, kohhran, ngaihhrui, ngaihhlutawm, phurhhlân, thawhhona, tawrhkhirh, tihhlawhtlinna, tihhrilhhai, tih loh loh ti, etc.

Mohchho sâkha liata ‘h’ sai ta sâpangawh (5) a ypa, Tlaikao reih liata a hluh ngâsâ. Pamosana ta : Chhinchhiah, Chhanchhuah, Chhawnchhaih, Chhawhchhi, Chhiahhlawh, Chhehchhawl, etc.
Mara reih mohchho sâkha liata ‘h’ sai ta sâpangawh (5) a yna mohchhozy: Chhâchhaih, Chhâhchho, Chhaihchhyh, Chhâhchhie, Chhôhhmoh, he hleikhô he a y khao leipa a châ thlyu aw.

Reichâ (Literature) ta â chhuahpa ama papeimawhsa kawpa sâkha cha reih parosazie hawhta châ roh thai awpah nata reih thai awpah he a châ. Reih parosazie hawhta châ ropa he language (reih) dopa a châ. Reih achu (learn language) ta â chhuahpa cha reih parosazie dopa reih thai awpah châ ta. A rozie spelling hawhrawh chhao â dopa ta a roh thai awpah a châ. Rozie â do vei khiahtala reizie a do thei hra aw vei. Châ rozie â do leipa, pahno thai thlâh ha awpah ta pachâpa he pachâzie do leipa a châ.

Mara reih rozie nata reizie a sia via thei nawpah ta, vowel hawhrawh â hnaipa ta eima parosapa maih, ‘h’ hawhrawh he chado leipa ta bai lymâ suh vy.

ECM Awnanopa member thokha tawhta mochho thokha, ‘h’ bai lei awpah ta ama pahruapa he a do vei. Mohchho ‘h’ bai byuhpa, bai bâ bai lei bâ ta ropa he a do thai vei. He châ rozie thiehpa he Lakher District Council, Literature Committee ta 1980 liata a taopa châ ta. Kô 1982 liata Mara Awnanopa Assembly ta Tisi khih liata a pyh ta. Minute No. 7-na a châ.

He châ rozie he Awnanopa lâta Rev. K.Itei, Education Secretary ta pahnosana a tao. Lakher District Council lâ tawhta Puhpa NT.Vakaw, Education Officer ta pahnosana a tao heih hra. L.A.D.C ta A.Zakia, Head Teacher Mara Grammar châbu pataosa ta. 1st Edition 1994 liata papuapa châ ta. 2nd Edition 2012 liata papuapa a châ heih. Châ rozie do viapa ta pachâpa he panano lei awpah a pha chai.

Mara reih aony he chyhsa thokha ta aony chhâh palih ta parozie a hnei a tahpa y ei ta. Eima yna kaokâh rei siezie ta ânano kaw thei tlai aw. Hlabu Biehrai châta reih hmâ viapa Tlôsaih reih he cha chhâh thôh m, r, d hawhta parosapa he a châ via chai. Aony khophiepa de tlyma, re tlyma parozie a hneipa y vei. ‘Rôhnah’ tahpa he d d ta a paropa a châ. Pachârôh, hneirôh, rôh vyhpa tahpazy liata ‘rôh’ tahpa nahta a parozie âlyu khai. Chavâta rôhnah, hmeihseih, nahkhaoh, khihnarâh (Kingdom), nahthlie tahpazy he Mara reih parosazie hawhta châ rozie dopa sai a châ. A parozie hawhta châ rohpa he pha chai ta. Vowel â hnaipa liata ‘h’ bai lymâ suh vy. Mohchho chhâna liata â hnaipa liata dei ‘h’ bai leipa ta, biekawh to liata bai awpah a châ. He hawhta : Lohheih, hrâhhraoh, râhhmâh, liahryh, hohhiah etc.

He châ rozie liata zi awpah ta dâh taopa (principle) he zi la. Na châ ropa cha rei chheipa nata pahno chheipa y thai aw vei. A reihpa maih ta ama pahno thai kaw sai aw.

No comments:

Post a Comment