Friday, January 31, 2020

Puhpa N.Zakhai, CEM ta 16th Mizoram Volleyball Inter-District Volleyball Championship 2020 opening ceremony hmâkhei

SIAHA, 28 January, 2020, Tuesday: Puhpa N.Zakhai, CEM, MADC cha khichhai laipa (Chief Guest) châpa ta 16th Mizoram Inter-District Volleyball Championship 2020 opening ceremony cha a hmâkhei ei. He  Opening Ceremony Programme a hmâna liata Chief Guest biereipazy:

He Inter District Volleyball Championship 2020 liata District sâhrawh hleikha (11) a vaw hlao thei ei chi ta,  châ ly hmeiseih ei na ta, Siaha District vyuhpa ta alynabie ei cha hlâ ei. Siaha District Volleyball Association hriapasana nata tiamana vâ chyuhta ta he programme hlaotloh theipa châ ta, ama chô liata alynabie ei reih hmeiseih.

Siaha Khihchhôh liata nama châh chhôhta aly kawpa nata paphasa kawpa ta nama y awpah ta ei khokheina sâh chaipa ei cha hlâ ei. Mizoram Volleyball Association hmahlana zawhzi ta Siaha District Volleyball Association ta Siaha Khihchhôh liata he hawhpa ataopasuana a vaw tlôkheipa he a rônah tah na ta, thyutliapazy châta pahaona (competition) rônah kawpa a patlôsa cheingei aw tahpa ei hnabeiseih ta ei ly hmeiseih.

Eima pahno chyupa hawhta kô 1976 khata Mizoram Sawhkhâ chata Mizoram Sports Council cha Sport lâ liata hmahsiena a y via lymâ thei n'awpah ta vaw padua ta, Mizoram Volleyball Association chhao kô 1981 khata vaw paduapa a châ hra.
He Council heta vision pha kawpa hnei ta, Sports lâ liata hmah eima sie thei via lymâ n'awpah ta Sports infrastructure, Coach, Sport lâchhâh a pahâhpazy, Sport discipline, etc ataopasuanazy a pachhuahpanoh tyh.

Khazohpa ngiachhiena vâta Mizoram he Sports lâ liata eima hmahsie kaw ta, Volleyball liata chhao thata hmia ei ma tôh. Siaha District chhao ta Volleyball Association paduana kyh liata hmah ama lana he rônah ei tah hmeiseih.

Volleyball Federation of India chata kô 2011 tawh khata Mizoram liata hmahlana thiehpa vaw padua ei ta, ko 2016 khata Pro-league cha Mizoram liata Mizoram Volleyball Association hmahlana zawhzi ta akhaih tyhpa a vaw châ haw.
Mizoram heta Volleyball liata hlaotlohna vaw to ta; Continental level, National nata Regional level lia chhao ta hlaotlohna rônah kawpa eima vaw to ha hra.

Continental level liata kô 2010, Kuala Lumpur liata Pihnô Lalhlimpuii cha India vyuhpa ta Asst. Coach châ ta, Pihno Vardingliani cha India vyuhpa ta Asian Youth Volleyball Tournament Player a vaw châ ha hra.
National level liata kô 1994 Madras (Chennai) liata III Mini-National Volleyball Championship liata Mizoram Team (Men) zy ta Bronze Medal la ei ta, National Sports Festival for Women, Jammu & Kashmir liata kô 2006 khata Mizoram Team (Women) zy ta Silver Medal ama la heih.

Cha tawhta, kô 2007 liata All India Rural Sports Tournament Aizawl liata Mizoram Women Team zy ta Gold Medal ama la heih hra.
Khazoh ngiachhiena vâta Regional level liata cha Mizoram Team heta lymâ hluhpi vaw la ha bâ hra ta, Team achatôhkhei khei kawpa ama vaw châ laih ha bâ hra.

Anodeikua cha a kheihawhpa ataopasuana rai he tiamana nata hriapasana mao-ohtheina, adaotheina peimawh kaw ta, eima zydua ta sâkhana châ khai thei leipa pi ta, chavâta Tlôdâh thai byuh ta, tlôlei dâh thai chhao a byuh hra.
Sports lâ liata pahâh ta, hmahsie via lymâ eima khoh khiahta cha Discipline hneipha byuh ta, pa-ôpazypa, paritheipa lâ lia chhao eimâ sohsi kaw awpah a byuh. Biehneituhpazy ta dâh nata phôh (rules) ama taopa zyh lymâ awpah a byuh.

Aly kawpa nata thapawh kawpa ta he Inter-District Volleyball Championship he namâ hmâh chyu awpah ta khokheina sâh chaipa ei cha hlâ hei. Ei châ ly kaw ei.
Puhpa JH.Beihnai, S&YO, Puhpa Syuhlo Beichakhei Mara, Private Secretary to CEM nata Puhpa Pawsa Lava, AITO zy chhaota ama zi hra.








































No comments:

Post a Comment