Monday, December 07, 2020

Puhpa N. Zakhai, CEM ta Puhpa Pachi Hlychho châbu ropa "HE LEI HRO" a palâhâh

 PRESS RELEASE

No.144/2020


Puhpa N. Zakhai, CEM ta Puhpa Pachi Hlychho châbu ropa "HE LEI HRO" a palâhâh


SIAHA, 03 Di (December), 2020 – Atanoh dawh 11:00 Am liata Puhpa N. Zakhai, CEM, MADC ta Puhpa Pachi Hlychho châbu ropa “HE LEI HRO” châbu cha Environment & Forest Department Conference Hall, MADC liata zawpi rei thei awpa ta a palâhâh.


He palâhâhna Programme he Puhpa K. Hrahmô, EM i/c Education, MADC etc. ta chhihtha ta,  Rev. V.L. Ngaia Hlychho, Sr. Executive Secretary, ECM ta thlahchhâna a hnei. Puhpa FC. Chhuasa, President, Mara Writers’ Club ta châbu thâtih rei chhieliena hnei ta, Laihsa Chhingpui Azyu ta hlasapa ta zawpi a palôpahawh. Puhpa Pachi Hlychho ta alynabie reina hnei ta, Bei thlahchhâna ta programme he khawpa a châ.


Châbu palâhâhtuhpa Puhpa N. Zakhai, CEM, MADC zachhihpa bierei tlâhpi viapazy:-


Atanoh December 03, 2020 dawh 11.45 Am liata "HE LEI HRO"  arotuhpa Puhpa Pachi Hlychho châbu he chyhsa zydua rei thei awpa ta nata chalei theih awpa ta ei palâhâh (release).


Pu Chairman nata châbu rotuhpa Puhpa Pachi Hlychho, chhôhkha zy, Rev. V.L. Ngaia Hlychho, Sr. Executive Secretary, ECM, Pastor zachhih kawpa zy, Rah chhituhpa zachhi kawpa zy, Office liata phahnaingiah kawpa ta he atanoh Office rai siesaipa ta châbu release-na pachâ peimawh ta he Forest Hall liata avypa zydua nama hnohta palôhru hmeiseih ta alyna ku chachâh lâ ei hlâ ei. 


Atanoh he COVID-19 hri-iah a charei ngâhai nota nata chyhsa chhao ta a sohsi pi ta a chado pi ta, sawhkhâ chhao bie piepa ta eimâ vaih n'awpa châta bie thata miah pie ta. Chyhsa hluhpi ahmôpakhypazy pasaih leipa châ ta, cha nota he zie nama vaw pua theipa he aly âchhih ngaita, nama zydua chô lâ liata alynabie ei reih hmeiseih.


Chief Guest ei châ tawhta cha ei kho khopa vaw reih thlâh h'aw sala. Chyhsa a hmô lei nota thâtih a reih hlâta cha hmiadai hmiadai ta chyhsa miah pahno kheituhpa ama y nozy ta eima thâtih aphana zy, a reithaina zy eima chhiena eima reipazy he a pha kawpa ta ei pahno. He "HE LEI HRO" arohtuhpa Puhpa Pachi Hlychho he châ chu daihti liata viasa pha kawpa châ pi ta, College eima kia daihti liata a close ngâsâpa eima châ.  Atanoh cha he lahpinô vaw hnei na ta sapa lâ liata ei Puhpa vaw châ pâ ta, apakyh ngaitapa eima châ. Nôchâ hrozie chhao a pahno kawpa eima châ. Ano he chyhsa nawhtaw khoh lei kawpa a châ. 


Reihkah Mara reih chhao he a thai kaw. Mara reih dopa he a thai kawpa ta ei pahno. Châ ro chhao he châ eima chu nota a thai kaw. Atanoh taihta châ rona lia heta ano he ei vaw phahnai khei kaw. Mara reih lia chhao Mongyu reih liata chhao he ei châ ropa he na vaw mopa tua teh tahpa ta ei saohiah ngâthlâh hapa a châ. A nawhtaw leipa ta ei saohiah tyhpa a châ. A talent hneipa he chyhsa chata a pasaih kawpa chyhsa a châ. Ei saohiah no maihta na bao tyh ta ei ly ngâsâ. 


Ano he achhiena lâ châ leipa ta a chakhiehcharieh kawpa a phana lâta a chavie chavâ kawpa chyhsa a châ. Hmo he a khohpahâh kaw tyh. Eima satlia nota tailoring liata eima chaopasyzy pabiesa tyh pi ta ano cha eikha pabiesapa a do thei beih vei, phie pakhua ta eino ei thôh chhâ tailoring pangai pakhua ta pabiesa pakhua awpa he a byuh tyh. Eima viasa paw Malsawma (miah a pahaissi hapa) chhochhi ta la "Pakhira" tahpa ta a moh a bi pâ ngâ kawpa a châ. Cha hawhta hmo he a khopahâhpa chyhsa a vaw châ. He châbu a vaw ropa he ei ly hmeiseih. A chôpho lâta mopa ta la a riahpha hmi kaw ta a ru lâ ta la chyhsa palôhliena hnei kawpa a châ. 


Puhpa Pachi Hlychho la miah a vaw pahâsai hra sala a hro nota châbu a ropa deikua thi beih lei p'aw ta chhâ kaw y lymâ awpa liata chhao a châbu ropa he ama vaw hmâh phahnai via lymâ aw. Eima chi nata pho, reih pabohsana lia chhao ta Mara reih cheingei ta châbu pha kawpa miah vaw ropa tyhpa he Mara chi pho châta la aly â chhih hmeiseih. A chô liata eimâ ly ngai ta. He châbu lia heta pasyuna zy, pahaona zy etc y ta reih na ai vei, a vaw pha ngaita kaw. Marapa châta cha he châbu he châbu pha kawpa a châ.


Ei châ ly kaw ei.


He châbu he tho 200 a hneipa châ ta, tlaw ₹ 200/- ta chalei theipa a châ. 


Atanoh ta he châbu Puhpa Pachi Hlychho ropa “HE LEI HRO” zuana mâ zydua he Drugs ataopa zy nata Hârapazy bao n'awpa châta a pie khai ei.  


ISSUED BY:-

Information & Public Relations Department

Mara Autonomous District Council

Siaha.



















No comments:

Post a Comment