Tuesday, August 01, 2017

How to check Airtel Offer Rs 399 Data Balance

Good news for Airtel prepaid user/customer:

All Airtel Prepaid users all over India received Airtel Offer Messages that says:

Get 84GB (1GB/day-on 4G H/S+4G SIM) & Unlimited calls, 84 days at Rs. 399. T&C For Offer, download My Airtel App, click Airtel.in/5/m.

Most Airtel Prepaid customers do not know how to check the above mentioned good offer Talktime and Internet Data Balance.

Just simply by dialling *123# does not show this offer Talk time and Data Balance....

But here is the solution and here is how you have to check this offer Internet Data Balance.....

Dial *125*1541#

Friday, July 28, 2017

PORN STAR SHELLEY LUBEN

PORN STAR TAWHTA
KHAZOHPA CHAKAOTUH NGÂCHHIHPA

SHELLEY LUBEN


(Mara Krizyhpa Thytlia sawzy Pornography tawh asohsi ei suh vy)

~ Abie Nôtlia


            A hro parohpa zydua siesai ta a daihti hneichhôhpa zydua Khazohpa chakao awpa ta hlâtuhpazy hry liata pakha Shelley Lubben thâtih he duah avaw laichadai tua heih suh vy. Ano he pitlohpa Film achâ tyhpa (porn star) châ ta, anodeikua Khazohpa lâ liata pipathina thiehpa a hnei tawhta deikua ano hawhta pitlohpa Film achâ tyhpa châta chakaona rai hria tyh ta, he molei seichâna su liata atâh lâlao hapa, pua thei khao tlôh leipazy pachhapapua awpa ta chakaona rai a hria dâh he rônah hmeiseih ta, a nahthlie chhao a pha kaw. Chyhsa sychaki nata pachaki moleina ro awpa hnei leipa hlâta cha, chyhsa pakha moleina ro hmeiseihpa, Khazohpa lâ aheina chôta Khazohpa alyna zie nata khozie hawh tlaita, mohropazy pachhapapua awpa ta chakaona rai a hria dâh he a rônah hmeiseih.

            Thyutôna: Shelley Lubben he May 18, 1968 liana khata Pasadena, California liata vaw pih ta, ama chhôhkha he Krizyhpa chhôhkha pha kawpa châ ei ta, a hawti via no chhaota Zisu Krista kyh a pachâ zie chhao a reih. Cha hawhta ama chhôhkha ta Krizyhpa chhôhkha maihsâh paduapa ta thapha kawpa ta ama y no chata a nô nata paw raihriana thiehpa vâna chata khih hro lâ a pasie ha ei ta. Khih hro lâ amâ pasie tawhna chata ama raihrianazy vâta Achhyna-o ama pangai tyhpazy chhao padâh via laih lymâ ha ta, cha hleikhô ta TV ama mo hluh tu hapa chata ama chhôhkha lia taihta thata rairuna a tlôkhei ei. Shelley chhao cha Primary â chu nota TV liata â lâ hra.
            Cha hawhta nohchareih a daihtizy a hmâ laih no chata chanô hawti khochhih kawpa Shelley, kô 9 uhtheipa cha vâduachhih kawpa ta chapaw thyudyupa pakha heta patupakhi ta! Cha hmo chata a hro zydua phiephieh a panano khai haw! Atahmâhlâ hawhta sapa nata palôhrupa lâta mohôhna phapa dao pha tlôh vâ. Cha a vâduana chata thata tlaita a hro liata theilâpa pha leipa vaw patheisa pathaopa ta, ano cha pua pachaipa hawhta apahnona nata molei pachaipa hawhta apahnona ta bie pathao ha ta. He tawh chhochhi cha ano liata chyhsa mo la khohna nata chapaw pachâna palôhrupa taih phaoh pathao ha ta.
            Thyudyu daihti a kaw hmâh pathaopa cha liahsa a patha ha hra bâ. Kô 16 a châ nota chanô chapaw châna (Sex) a hmâh pathao ta, o lâ liazy chata Playboy Playmates nahzy atobi dâh hawhta atobi tyhpa ta, a vaw pitloh via tawh chhochhi cha Sahma nata Drugs tao pathao ha ta. A chhôhkha nahzy chata buakhei dâh n’awpa ama pahno leipa vâna chata, Shelley cha kô 18 a châ nota a chhôhkha nahzy ta ama pahrâna-o tawhta ama papua haw.
            Ama o tawhta a pua tawhna chata San Fernando cha nie nata do awpa chhao hnei leipa ta tlô ha ta. Cha hawhta viavipa ta khiliah â khieh laih liana chata chapaw pakha he a tyh ta. Cha paw chata khihsakhoh awpa ta hrua ta, cha chapaw hruana hawhna chata a eikha n’awpa ta a pôhpa cha sôh a hnei leipa vâna chata Dollar 35 ta zuah ha ta.
                Shelley cha, cha hawhna chata sihryhna hro cha a hmâh pathaopa ta hmo no-âhchhihpa nata rarôh-y kawpa hluhpizy a tyh laih ta, anodeikua tao lyliah hnolo lymâ laih ta. Anodeikua sôh vâna chata a tao tyhpa cha bâsai leipa ta pazao lymâ ta. Riasaw zy phaohpa ta, Khizaw phasana kao nano nanopa liazy chata a zie laih ta. Anodeikua a hro cha hnabeidyna nata vâsâhna ta bie ha tlôh..
                “He hawhta daihti ei hmâ no heta ei hawti nota kyh ei pachâ kaw tyhpa nata ei pasô kaw tyhpa Zisu Krista chata ei palôhrupa ochhi he vaw chakhyh ngâkaw tyh ta. Châhrasala keima deikua ta pahnolei apachâsa raruah tyh na ta. Khazohpa chata na uasa vei khiama tahpa ta ei aoh khopa pipatlohsa awpa ta cha moleina hmo kheihawhpa rai hria ta, tao awpa apapeisa tyh va na,” tahpa ta Shelley chata he nota a daihti a hmâna dâh a reih.                                       Sihryhpa ta a sôhpalienapa cha patupakhina nata taolana zy, risk zy atyh ngâthlâh ha ta. Sôh a hmô tlakaihpazy cha Sahma nata Drugs chaleina liata a pachhâ lilaw khai ha tyhpa vâna chata Sihryhpa ta sôhpaliena cha siesaipa ta Porn Industry lâ Pitlohpa Film achâ awpa ta apalie ha ta. Kô 24 a châ no tawhta pitlohpa film achâ pathaopa ta, kô 1993-1994 liana khata pitlohpa film 30 hlei achâ hmâ ha ta. Anodeikua sex ahmâ pahlao pahlina vâ chata sex tawhta pasana hri kiah theipa Herpes nata Human Papilloma Virus (HPV) pasana cha ala ta. Cha hmo chata a hro hnabeidy chiehpa cha hnabeidyna lai viapa lâta angiakhei lâlao ta. Kha hlâta Sahma nata Drugs a tao tyhpa hlâta hluh viapa ta tao baichhi pathao ha heih ta. He pasana a kiah tawhna heta azyh zyh ta Porn Industry cha siesai pathao ha ta. Anodeikua Sahma nata Drugs deikua pathleih thei pyly vei.
            Pachhapuana:  Chatanachata kô 1994 liana khata Bar sâkha liata satlia sia vovâ kawpa,  a hnôh lâta avahpa achâ hapa Garret nah chata atyh ei ta. Garret chata a date awpa ta hruapa ta viasa pha kawpa châ ha ei ta. Garret he Krizyhpa hâra deichhyna-O liata laiseihpa, Krizyhpa siku liata châ achupa, pihpathi pha kawpa chyhsa châ ta. Shelley hnona chata a hro hnabeidychhih kawpa tawhta pachhapapua awpa a khoh nata khoh lei cha hiahri ta. Hro hnabeidy kawpa Shelley chata a vaw khoh hmeiseih! Chatanachata thapi phiapa ta Garret deichhyna nata baona ry liana chata Sahma nata Drugs cha pathleih laihpa ta, pihpathina dopa cha vaw to ha ta. Chatanachata, Shelley nata Garret cha February 14,1995 liana khata dâh pathaihpa ta, baokha châ awpa ta nôvah châta amâ vaw tao haw. He hawhta amâ hnei tawhna heta kha hlâta daihti khô chiehpa liata a tao tyhpa, a hroziezy chata pazei palie châh hnei tyh hra sala, Shelley nata Krizyhpa satlia Garret zy chata rairuna nata tymâna hluhpizy atyh tyh hra ei sala, Khazohpa lâ khâchâ aheihpa ta Awnanopa khâchâ apabai ei ta. Tacoma, Washington liata Champions Centre Awnanopa liata thapi phiapa ta ahmâh lymâ ei ta. He chôchâh liana heta Shelley chata, “Khazohpa nahta cha, ei moleina zydua he ngiahthaipa ta ei y tahpa apahnopasia na ta, chyhsa thiehpa ei vaw châ haw. Khazohpa chata ei daihti khô chiehpa zydua mypa ta chhâna hnei leipa ta kyh eina pachâ tahpa ei pahno. Ei hmia lâ daihti châta thata einâ vaw chhuady chhieliepa he tlao a vaw châ,” tahpa ta a reih. He hawhta hro thiehpa a hnei tawhna heta Shelley heta Web Designing lâchhâh achu pathao ta. He hleikhô ta College kiah pathao heih ta. Khazohpa bie achupa ta Theology nata Counselling liata Bachelor Degree chhao a hnei pâ ha hra. Chatanachata, kô 8 khô chiehpa liata sihryhpa pualei kawpa Champions Centre khâchâ abaituhpa Khazohpa chakaotuhpa peimawh kawpa pakha avaw châ haw. Khazohpa chata Sahma nata Drugs iah ta a zai chiehnapa zy, palôhru rietheina nata tymâna nano nanopa zy, chanô chapaw hmâna (Sex addiction) tawhta zy a pachhapapua zie nata cha hawhpazy châta keih chakâ awpa ta Khazohpa ta ano châta lâthlôh â vaw chhuahdy chhielie zie pahno ha ta. Ano hawhta moleina seichâna liata atâh ngâhaipazy pachhapapua ta, Khazohpa thâtihpha chho awpa chata a daihti zydua ahmâh ha ta. A rai liata âpie hleikhô ta a pahâh ngâsâ.
            Pink Cross Foundation: A hawti nota cha Shelley heta Khazohpa biechhotuhpa châ awpa he byuh kaw tyh ta. Châhrasala a hro liata vâduana nano nanopa â tyh liahsa tawhta Khazohpa ta pachhapapua ta, tahmâ cha Bachelor Degree hneipa ta chyhsa nano nanopa hnohta a hro tawhta hmo â tyhpa nata Khazohpa ta a pachhapapua dâh zy, chyhsa nano nanopazy hnohta reih laih ta. Chatanachata kô 2005 tawhna khata Internet lâta  Social Networking Site hmâh phahnaipa ta, ano hawhta rairuna atyhpa, Sex Industry liata âtâh haipazy pachhapapuana rai cha hria pathao ha ta. Kô 2008 liana khata py sâkha Pink Cross Foundation cha a vaw padua haw. He Pink Cross Foundation ta â chhuah chaipa cha Porn Industry (pitlohpa film taona su) liata ahlaohlipa, achâtuhpa (porn star) nahzy hry liata hro hnabeidypazy pachhapapua awpa a châ. He rai siekhei awpa heta website siepahliepa ta donation pakhy ta, a hmô chhao a hmô pha ngâsâ. Cha sôh hmâpa chata Porn Star nahzy cha hmosaipiepa hlâ tyh ta. A hmo piepa byh liana chata Bible zy, Khazohpa bie rona châbu zy, Gospel Music CD zy, khokheina Card zy nata thlahchhâkhei ngâthlâh hapa ama châ zie pahnosana zy, ano bie achhopahlie ta ama rairunazy chho awpa rona châhna zy khô tyh ta. Tawhta la, a website siepahliepa heta Porn Movies moh tyhpazy cha Pornstar nahzy duahmo dopa nata ama hro ngiachhie â chhi zie zy, bao amâ ngiah zie zy pahnosa tyh ta. Pornstar nahzy chhao ro awpa ama khoh nata khoh lei hiahri tyh ei ta, Porn Industry siesaipa ta hrothiehpa hnei khophazy cha kao nano nanopa tawhta baopa ta ama deichhy tyh. Tahmâ he Shelley Lubben he avahpa Garret nahta saw pathôh hneipa ta Khazohpa ama chakaona rai pazao laih hnolo lymâ ei ta, Jail liata zy, TV, Radio, Film, Conference nata Pink Cross Foundation siepahliepa zy ta Khazohpa bie tlâh-awhkheipa ta mohropazy châta ama daihti zydua ama hmâh tyh. Shelley Lubben heta Porn Industry châna dopa tawhpapua ta, he Industry sawkhâ ta a kohki thei n’awpa ta thapi phiapa ta hmah la ta, California Legislator Charles Calderon nahta chhao rai thata ama hriakhoh hra. June 2010 khata US House of Representatives liata Senate nahzy hmiakô liata biereina hneipa ta, TV Show moh alâluah kawpa Howard Stern show, ABC news Nightline, The 700 Club, Fox 11 News, AP News nata Show alâluah kawpa nano nanopa liatazy a daihti khô chiehpa, rairuna hluhpi atyhpa ta hro hnabeidy kawpa tawhta Khazohpa ta a pachhapapua dâhzy tlâh-awhkhei ta, chyhsa hluhpi ta ano siepahliepa ta thlahpa lâ athôkheina ama hmô tyh.       Rei chiehpa hawhta Shelley Lubben heta a website www.shelleylubben.com nata www.pinkcross.org  hmâpa ta chakaona rai he thapi phiapa ta hria lymâ ta. He website liana heta Pornstar moh alâluah kawpazy khihsa zie nata ama pihpathina dâh Testimony, âmo ta ama ropa cheingeizy tawhpapua tyhpa a châ. Sex nata Porn Industry tawhta pasana hri chichhihpa kiah theipa a châna dâh palâsa tyhpa châ ta, he hleikhô ta Pink Cross Foundation chakaona rai hria dâh zy, ama nothlahpa nata ama hmotaopa chi nano nanopazy ama palâsa tyh. Tahmâhlâ khizaw liata Porn Industry he sôhpaliena su hlaotloh chaipa nata athôh chaipazy hry liata ahlao phapa châ ta, keimo râh tawh cheingei chhaota Internet siepahliepa ta eima khopa maih eima moh thei ha bâ hra. Anodeikua, he eima Film, nohthlapa mopazy he pha kawpa hawhta â lâ nota, hiakha lâ liata hmo a ypa deikua pahno thlyu’ ma pi. Pornography he Addict nao kawpa, eima thlahpa hro nata nôpi nôvah likah taihta parao theituhpa a châpa vâta Mara Krizyh Thyutliapazy Pornography tawhta eimâ sohsi awpa â ngiah hmeiseih.

Sadhu Sunder Singh thatih ronahpa

Sadhu Sunder Singh thâtih rônahpa

Original Source: Het Zoeklicht magazine.

Translated into Mara by : L. Beinawsa. February 11, 2017.


Krizyh ngiapâtuh rônahpazy thâtih reina lia maihta a thâtih adiah beih khao lei awpa, Sadhu Sunder Singh he kô 128 avaw khô chiehpa  Thlarâh (September) 1889 khata India râh Rampur khih, Patiala liata avaw pihpa a châ. Sunder Singh tahpa he amoh dopa châ ta, Sadhu tahpa he cha ama zyhna châta ama hro ahlâ khaipazy reina a châ. Ama chhôhkha he khihsa thei (hneirôh) kawpa châ ei ta, Sikh zyhna angiapâpa chhôhkha ama châpa vâta a nôpawzy ta Hindu zyhna (Hinduism) pachuna thata ama vaw pachu tyh. Hawti a châ no tawhta a nôpawzy hnohta Hindu Achhyna o (temple) lâzy khâ asie tyh hra. Kô 7 a châ no tawhta Hindu Khazohpa achhyna hla "Bhagavadgita" ama tahpa hla chhao liahsa â vao ha hra. Kô 16 avaw châ tawh cha Hindu châbu peimawhpa "Veda" chhôh liata pachuna hluhpi a vaw thai ha. He leipa Islam pachuna bu Koran chhao a vaw reih tyh hra.
            He hnôh lâta Sadhu châ achhuahpa ta, Sadhu  ama tahpa thokhazy cha apakyhpa ta, âmo chata Hindu zyhna hro (Hindu Discipline) ama pachu tyh. Sadhu nah he khizaw hmo zydua hnôhchhypa ta ama zyhna Hindu châta ama hrochhôh noh zydua ahmâhpazy ama châ. Pahnothai via n’awpa ta Hindu zyhna thâtihpha bie achhotuhpa ama châ. Chatawh cha a chhôhkha siesaipa ta lahpinô chhao hnei leipa ta nata khâpa hmah hnei leipa ta, poh maihpa abupa ta India râh achahryh laih hra. Chyhsazy ta ama baona chyhpa ta hleikhô khâpa hmah a hneipa y vei. Châhrasala a zyhna châta apôhpa nata ahro zydua â hlâ/pie pathao no heta ahro liata khâpa tlyma ruapa ta y ta, palôhru thlalôhna nata thadâh kawpa ta apahâna a hro liata hmô / hnei thei vei.
Sunder Singh he Sadhu châ awpa ta apasyu tuhpa nata thapatlôtuh chaipa cha anô he achâ. Anô heta khizaw hmo khâpa hmah tlaichhai leita thlalôhna tluapa ta â ngiapâna khâ patu ta, sadhu châ awpa he khâ a vaw pasyu tyh. Châhrasala a pachâna liata thlalôhna kipa hro rai hnei thei hlei vei. Anô hmiapahnopa Rajpur liata British Missionary zy ta ama paduapa Mission School liata â ngia ta, he school lia ângia rakha tawhta BIEHRAI a vaw hmia pahno pathao chyuchyuhpa châ ta, he nota BIEHRAI he a vaw pahâhkhei lei kaw. Biehrai hlâta cha Hindu zyhna pachuna (Hinduism) lâchhâh a thathyu khei via.
            Kô 14 a châ nota a nô  heta thisai ha ta, he rakha tawhna heta Sunder Singh he a hro âthla ngâsâ ta, “Biehrai liata Bei Zisu pachuna cha pachuna do leipa a châ” vaw tah ta, Biehrai cha hrie ta, arao hleikhô ta, Khazoh bie areihpa chyhsazy alô ta vawh tyh ta, mohro nahzy chhao ano hawhta tao hra awpa ta a pasyu tyh hra ei. Châhrasala ama zyhna châta â piena nata atlua hnolopa thlalôhna nata thadâh kawpa ta a pahâna su cha hmô hlei leipa ta, apalôh hnabeidy ngâsâ ta, ano sasyh liahnychei khohna palôh taih a vaw hnei ha.
            Biehrai mei ta arao tawhta anohthôhna noh my liata a palôh pachârôh tupa vâta my 3:00am rachhôh ta âziana rakhô tawhta thyu ta, Khazohpa hnohta thlah thlai chhâ ta, "Khazohpa, na y hmeiseihpa tlai a châ khiah lâpi dopa na pahmô la, cha leipa khiala, eima o hnôh lâta my 5:00am ta a vaw sie tyhpa tlâhbalyh (train) ei chariesa sao ha aw" tahpa ta thlah a chhâ. Chahawhna chata chhâ chanei heih ta, cha nota a chhôhpadâh (room) cha eikhapi ta vaw khaih ta, Sunder Singh cha meikâpa khiama a châ vaw tah thlâhhâ ta, châhrasala cha hawh meikâpa khâpa hmah a y tlôh leipa vâta a thlahchhâna chhâpa adao hapa ta â pachâ. Mei khaihpa amo thlâhha nota akhaihpa hryhrih liata Zisu nothlahpa hmô ta, chatawhna chata ao a thei. Ao atheipa cha Hindi reih lâ heta "Kha châ e eina tlua aw chi? Nâma pachha awpa ta ei vy. Lâpi dopa na pahmôsa la tah chi ta, khazia lâpi dopa cha tlâ nâchhih vei?" vaw tah thlâhhâ ta. Cha tawhna chata Sunder Singh cha Zisu thi vei, ahroh thlâhhâ tahpa avaw pahno pasia. Ahmia liata apakhu thlai paneih ta, cha rakha tawhna chata avaw hnei beih leipa no-âh chhihpa thlalôhna cha a vaw hnei ha.
He tawhna heta ahro parohpa zydua pahleipa ta hroh thiehpa ta âtao pathi khai ha.He hawhta hro thiehpa a vaw hnei ha nahta cha bâti châ awpa khoh ta, châhrasala a chhôhkhazy ta vaw paryhsa leipa ei ta, a chhôhkha nah paryhsa leina chôta kô 1905 khata a pinoh tlaita Shimla liata Mongyuh Achhyna/Apakhyna o liata bâti cha achâ pyly hapa a châ. Cha noh tawhta Sunder Singh cha a hro Krista châta âhlâ khai thei n’awpa ta Krizyh Sadhu châ â chhuah ha bâ. Hindu nah hryta Hindu Sadhu châ achhuahpa tlai cha Krizyh Sadhu châ â chhuah ha.
He hawhta Krizyhpa a vaw châ ha nahta cha a paw ta a saw châna tawhta thy ta, a chhôhkhazy ta ama o chhôh tawhta ama papua ha. Chata, October 16, 1905 khata khâpa hmah hnei leipa ta, poh maih abupa ta nata pheiruapa ta a sie pathao ha. He no deikua cha Hindu Sadhu châ khao leipa ta Krista pheihnie pazipa ta a siena a châ ha bâ. Kô 1906 khata a hmiatua chai  ta Tibet râh lâ thâtihpha chho awpa ta a sie. He hawhta thâtihpha chho awpa ta a siepa he ahyhmah ta chyhtuhpa/baotuhpa (sponsor) hnei leipa ta, hlao a pie awpa chhao y hra leipa ei ta, khâpahmah a hneipa y vei. Châhrasala Khazohpa ngâna chôta nata ano moh vâta rairuna nata rietheina chito rai tao  ngâhpa ta Tibet dâhhaw suana râh chakua ngaitapa lâna cha a siepa achâ.    
Tibet lâ a siena lâthlôh liata vâhneichhih kawpa ta American Missionary pakha Stoker, ano hawhta poh maihpa abupa nahta a vaw tyh chho ei ta, chatawh cha rairuna chito rai chatôh khohpa ta, dâhhaw tlana râh chakua ngaitapa liata nie’pa chhao hnei lei ta thokô ry nata lôkhaoh liatazy amâ rie khoh laih tyh. Aly kawpa ta rairunazy tao khoh laihpa ta Khazohpa thâtihpha bie ama chho khoh lymâpa a châ. Eikha cha Sunder Singh he tlâh leipa ta, a viasa Stoker heta European chyhsa pakha nah o liata tlôkhei ta, a mohôh. Cha ama tlôna o liata European paw cha Sunder Singh âpiena châ aropa a hmôpa cha a palôh pahnie kaw ta a pihpathi pâ hapa a châ.    
He hnôh lâta Sunder Singh cha a viasa chakaolâhpa nahzy pachâna piena vâta St.John School of Theology, Lahore liata kô 2 Khazohpa bie achu heih tua ta, cha khai tawhta Khazohpa rai a chakaona thâtihpha bie chhona cha a pazao heih. Eikha cha thokô chô liata a pahâ ta, rietheina vâta a hmia liata mathlaiti  azaloh ngâpazy cha ahru ta Khazohpa hla asa ngâno ta zawpi hry liata pakha heta thokô tawhta akei pathla ta alei lâ a za tla ha, Sunder Singh cha areih leipa ta kaw thyuta china rai hnei leipa ta ano ataolatuhpazy châta thlahchhâ ta, Khazohpa kyhpachâna nata moleipazy châta a thina thâtih a chho lymâ ei, ano ataolatuhpa hluhpi ta Krista liata amâ pie ha hrapa a châ.   
            Nohkha chhao Nepal râh râhhmâhpa liata a sie hai no ta, chyhsa chhoru/moleipa mo 4 penawh ta abykhâh ei ta, ama hry ta pakha heta zaozi seih kawpa pahieh pahâpa ta a pachisa ta, Sunder cha a hmia alei lâ abôhpa ta tanoh he ei hro chhâna noh cha a châ bâ tlai hi, tahpa â pachâ ha bâ. Sunder cha Khâpa hmo hmah a hnei leipa vâta a hnei chhôhpa poh lapa ei ta ama pasiesa ha.  Ahnôh lâ via ta ama hry liata pakha heta Sunder cha aw pakhua heih ta, athâtih pahno byuh kawpa ta amohzy a hiahhri. Sunder cha a thâtih nata a mohzy a chho liahsa khai tawhta a Biehrai pakai ta chyhsa hneirôhpa nata dyhchhiepa Lâzarâ (Lazarus) thâtih nata Khazohpa hnohta ropa ta ano lâ eima kua khia maniah â ngiathai thei ziezy chho ta, cha chhorupa chhao cha ropa ta a pihpathi ha hrapa a châ. He chhorupa heta Sunder cha a o lâ taih âchhi pâ ngakawpa a châ.
            Kô 1912 liana khata Bei Zisu noh 40 nie lei a ypa hawhta noh 40 nie lei y achhuah hra ta, châhrasala y patlô thei vei. Châhrasala he hmo vâ heta thlahpa lâta hlaohna hluhpi a to. Taolana hluhpi tao laih tyh ta, châhrasala no-âh chhih kawpa ta ABEIPA ta pachha papua heih tyh.
            Kô 1914 liata Buddhism a vaw puana ama zyhna liata â-i ngâsâpa Nepal râh Rasa ama tahpa khih liata thâtihpha a chho heihpa vâta ama khih beipa Lama ta Sunder cha thie awpa ta a phuah. Sunder cha tikhaoh kuapa âpathu ngaitapa liata thlahruapa ta pathla ei ta, apua thai lei n’awpa ta châhbi ta ama khaw khâh haw. Cha tikhaoh cha chyhsa moleipa ama thiepazy ama pathla tyhna su châ ta, tikhaoh liana chata noh no chhôh chyhsa ama thiepa ri hryhri liata niedo leipa ta thlahruapa ta y ta, a noh nona noh liata pahno leipa chyhsa pakha ta Sunder cha tikhaoh châhbi vaw pahypa ta a papua tawhta tikhaoh cha khaw pakhua heih ta khâpa hmah rei leipa ta alei sai syulyu ha. Tikhaoh tawhta a pua tawh rei leipa liata Sunder cha patu pakhua ha ei ta, ama khih beipa Lama hnohta amâ chhi heih. Lama hnohta amâ chhi heihpa cha Lama cha  ano-âh ngâsâ ta, châhbi a hnohta khâ aso ngâ thlâhhâ tyhpa tlai ta tikhaoh athuh ngaitapa chhôh tawhta a kaw pua thlâhpa cha Sunder Singh he Khazohpa hmotaothei ngaitapa ta avaih tahpa pahno ta, ama khih beipa cha chi ngâsâ ta ama râh thlai puasai awpa ta ânaohpâ ngakawpa a châ.  
Kô 1918 khata Madras tly heih ta, thâtihpha bie areipa nahthlie awpa ta chyhsa sâh hluhpi avy pakhy ei ta, cha liana chata Khazohpa bie reih heih ta. Zisu ahnohta a yna maihta kheihawhpa su liata a ypa chhaota a thlalôh zie nata patâhna o lia a y no chhao ta a hnohta a y ziezy areih. Khazohpa ta patâhna o zy cha vârâh pachâsa heih tyh ta, a phaohrinazy cha byhnâ a pachâsa lilaw heih tyh a tah. Cha liana chata Krizyhpa thokha Khazohpa rônahna/thlahpa ato leipazy chhao ama y. Cha nahzy cha ama pachâna lia deita Zisu y ta, ama palôhrupa liata Zisu a y hmeiseih leipa vâta Khazohpa rônahna ama hmô thei leipa a châ. Palôhru tlokhuh ta eimâ hlâ/pie nahta deita Zisu eima hmô thei aw a tah.
            India râh su nano nanopa liata Khazohpa thâtihpha bie chhopa ta atly hleikhô ta, kô 1918-1919 likah khata Malaysia, China nata Japan râhzy tly ta, kô 1920-1922 likah khata Western Europe, Australia nata Israel râhzy atly heih hra. Jerusalem, Lima, Berlin khihpi liatazy Khazohpa thâtihpha bie chhopa ta atly laih hra. He atly laih no heta hmo no-âhpazy chhao hluhpi âtyh laih tyh. Sunder heta ano sasyh a pachâ peimawh beih leipa ta, Zisu Krista pheihnie pazi ta, moleipazy nôphana ta achhy palie ta, a khakhaipazy chhao kyhpachâna ta pahnie awpa â chhuah lymâ tyh. He hawhpa palôh a phaoh vâ heta chyhsa hluhpi palôh pahnie ta, ano âhaotuh penawh chhao ama noza ngâsâ tyhpa a châ.
            Eikha chhao chyhsa hluhpi amâ pôhpakhyna Bazaar su liata bie arei heih nota zyhna hropa chyhsa pakha heta achachâh lâ baih avaw chô thlâhhâ ta, Sunder cha reih leipa ta a chavei lâ baih dao heih ta, deikua cha chyhsa chata ârâ sai ha. Cha zâ lia pyly chata cha chyhsa chata a palôh ngiaryh lei kawpa vâta Sunder cha ngiathai â vaw haw lilaw heih. Khazohpa bie arei nota chyhsa hluhpi ta alô ta vawh chaimâh ei ta, pakhapaw cha Sunder Singh luh lia tlai vaw pasu hata, chata aluh avawh pasupa ta nahta avawh pasutuh paw tlai cha aluh pasa ngâsâ ta alei lia pao thlâh hâ ta, Sunder cha ano alô ta avawh tuhpa cha va pangai ta a bao. Ahnôh lâ cha a viasa pâ ha ei ta, a o lâ taih âchhi pâ ngâkaw hrapa a châ.    
Sunder Singh chyhsa areisi ngâsâpa châ ta, chyhsa raihria ngâpazy ahmô khia bao tyh ta, ama vaw pangai nahta rypaohna cha leipa ta Khazohpa biereina châta a hmâh tyhpa a châ.    
            Sadhu Sunder Singh he kô chareih ta nopi noh daihti liata Tibet he khâ a tly tyh. Tibet râh he pachâ peimawh ngâsâ ha ta, kô 1929 liata tly heih ta, he rakha tawhna heta a thâtih pahno awpa a y khao leipa achâ. Alei dâh he ahyhmah ta a pahnopasiapa y leipa ei ta, thokha ta chyhsazy ta ama thie hapa a châ awpa ta pangiasapa y ei ta, thokha ta dâhhaw hry liata âhluah sao hapa a châ awpa ta pangiasa ei ta, thokha heihta Khazohpa ta ahrohpa ta avâ lâ ala hapa a châ awpa ta a pangiasapa chhao ama y heih hra. Chatanachata ngiapâtuh phapa, riahphapa nata Krista châta pasaihpha hmeiseihpa cha a thâtih chhao pahno leipa ta he khizaw he a vaw leisai hapa achâ.  
Sadhu Sunder Singh ta Biehrai bie tha â patlôna chai tyhpa cha "Ahyrai a hro a pabohsa khohpa maihta pahlei aw ta; ahyrai keima vâta nata thâtihpha vâta a hro a pahleipa maih a pabohsa aw" Maka 8:35.tahpa bie he a châ.                                                                                                                                                                   
            

MARA LITERATURE HMAHSIENA RAIRUNA NATA HMAHSIE NAWPA TA PACHA PAZINA

MARA LITERATURE HMAHSIENA RAIRUNA NATA,
HMAHSIE N’AWPA TA PACHÂ PAZINA

~ A.Zakia, Head Teacher (Rtd),
Siaha Vaihpi

Mara reih châhnawh eima vaw hnei pathaona nata, châ eimâ chu pathaona cha kô 1908 a châ. He Châhnawh maniah a taopa tuhpa he Rev. R.A.Lorrain (L) eima Missionary châ ta. Mara Literature hmahsie nawpa heta Châbu maniah apatohpatiapa liata a chatlie-chakoh ngâsâpa ta ei pahno.

Kô 1908 liata A AW-pa bu, “ACHUTUANA BU” tahpa Châbu maniah taopa ta. Mara reih nata English reih ta Dictionary, Grammar, Kô 1909-1911 liata tao ta. Kô 1912 ta Thâtihpha Zawhana Châbu tao ta, Kô 1930 liata Biehrai Thiehpa Châbu maniah papuapa ta, Kô 1933 liata Hlabu, Hla 194 a ypa manaih papuapa ta, Kô 1934 tawhta Siku liata achuna bu, Mathematic Châbu zy, Mara Geography Châbu zy Esop phôhpa Châbu zy maniah papuapa ta. Biehrai parohpa he kô 1923 tawhta palie pathaopa châ ta. Biehrai parohpa cha patlô hmâ leipa ta, Rev. R.A.Lorrain cha February 1, 1944 liata maniah â pahâsai haw. (A daihti liata Mara Literature a hmah a sie kaw)

Rev. A.B.Lorrain Foxall a hrialâhpazy ta Biehrai parohpa paliepa cha hria pazao ei ta, Kô 1957 liata Biehrai parohpa hnei paki pi ta. Biehrai parohpa nata Biehrai Thiehpa pahlyhpa, Biehrai Pathaihpa (Holy Bible) cha kô 1972 liata chhuh patlôpa châ ta. February 25, 1973 liata palâpapuapa nata zuah papuapa a châ. Zyhna kyh lâ châbuzy cha Bible chhopasiana zy, Sunday School achuna châbu zy, châbu chi nanopazy ama papua hluh kaw bâpa ta â lâ. Achaleituhpa deikua eima chyh ngâsâ. Zyhna kyh (Religion) châbu taona liata Literature lâ hmahsie via lyu pi ta. Châbu achaleituhpa deikua eima y leipa a châ. He heta Literature liata eima hmahsie leizie â lâ pasiapa ta ei pahno.

Khizaw thaina nata sona lâta châbu deikua arohpa eima chyh ngâsâ. Literature lâta hmahseina eima hnei thei leina chhâpa cha kô 1948 – 1978 likawh kô 30 chhôh, eima Mara reih thyusai pi ta. Tlaikao reih eimâ chu hapa vâta a châ. Kô 1975 tawhta Mara reihchâ kuahnao eima chhuah tawh chhao ta Mara reih a pasâhsa leipa ama y ngâthlâh hapa ta â lâ. Chavâta Mara reihchâ (Literature) liata hmah ama sie thei leipa a châ.

Kô 1978 tawhta Mara reih ta Primary School liata Exam-na hnei pathaopa châ ta. Eima Missionary ta Châhnawh maniah a taopa liata hawhrawh baichhi awpa chôchâh liata ei sari tlai, châhnawh pananopa ta eima y. He he Mara reihchâ hmahsie leina a châ. Achutuhpa châta chhao noraina a tao.

Zawpi ta ahmaohpakhyna (Seminar) hnei pi ta, Mara reih siezie awpa ta eimâ pyhpa zy, Literature Committee ta reih hmâzie nata rozie awpa ta a pathlupazy a pyh leipa ta. Eima khozie hawhta châ roh eimâ chhuahpa he eima reihchâ siezie alyu (Uniform) thei leipa ta, reihchâ siezie adochâh hra vei.

Mara reihchâ (Literature) hmahsie awpa eima khoh khiahtala Mara reih pasâhsapa ta, hmâh hluh ei suh u. Châ reizie nata rozie thai awpa ta châbu reih hluh sih la, châ roh hluh ei suh u.

Mara reih he Primary Siku nata Middle Siku liata dei achu leipa ta. High School nata College lia taihta Mara reih he achupa ta eima reih achupa (Vernacular) ta hnei sih la. Mara reihchâ he thai via aw pi ta. Hmahsiena lâ a pangai cheingei aw. Châbu chhao eima tao hluh viapa a byuh aw.

Pachutuhpazy ta Mara reih châ reizie nata rozie he eima thai pachai awpa a châ. Reih thai pasia awpa ta cha reih siezie achuna (Grammar) eima thai awpa a byuh. Grammar cha chi no ta pachhaihpa châ ta. English ta cha (1) “Formal Grammar” tah ei ta. (2) “Functional Grammar” tah ei ta. Reih thai pasia awpa ta cha a sâno heta eima thai awpa a châ.

Formal Grammar cha châ rozie do kawpa ta roh theina châ ta. Functional Grammar cha bie rei theina nata thaina châta a châ via. Eima reih ta bie reih kyh liata eima châta riaruna a y leipa hawhta pachâ sih la. Châ rozie nata aony hmâzie a chyhta eimâ chu tua aw:

Personal Pronoun hmâzie nata rozie -
‘a’ nata ‘â’ hmâzie -
‘pa’ Noun (hmo moh) liata bai a byuhna.

Puhpa N Zakhai CEM

Puhpa N. Zakhai, CEM thiehpa
Alykheina rônah kawpa ta

Theivâ liata hneipa a châ.




Târi 3rd Chhiepa, 2017 (Pachyh noh) liana khata daw 11:00Am liana khata MADC CEM thiehpa Puhpa N. Zakhai alykheina cha Community Hall, Theivâ liata hneipa a châ.
            He alykheina liana heta Puhpa N. Zakhai, CEM he Siaha tawhta EM thiehpazy nata Hlasa thaipazy, MADC Officer zy, Congress Party tawhta zy hleikhô ta thâtihbu chyhsa ta zipa ta ama chakaochahlâh.

Puhpa N. Zakhai thâtih tlâhpipa :
            Puhpa N. Zakhai he Kô 1956, October thlâpâ noh 21 liata Theivâ khih parohpa liata vaw pih ta. Ptimary nata Middle School he Theivâ liata achu ta, Siaha liata High School a vaw kiah.
            PUC he St. Anthony’s College liata achu ta, BA he St. Edmund’s College liata patlô ta, MA he NEHU lia â vaw chu hra.
            Kô 1986 liata Theivâ zuah HC. Nupaw nata ahnei ei ta, saw chapaw pakha nata sawchanô pathôh ama hnei.

Alykheina liata Puhpa N. Zakhai, CEM Biereipa peimawh viapazy :

1)      Atanoh he ei chyhta tawhta Khazohpa ta eina cheihchalo vâta ei ly chaina daihti a châ.
2)     Ei mâlâ chhaota ei sa beih leipa, ei phuh leipa CEM ei vaw châpa he nama thlahchhâ kheina vâta a châ. Mara zawpi zydua chô liata alynabie ei reih hmeiseih.
3)     Amôbyuh Bia zawpi deichhyna zawhzi ta he hawhta alyna kyhchhi tao theipa a châpa he a rônah tah na ta, palôhru hmeiseihpa ta alynabie ei reih.
4)     Alyna Programme ahmâh awpa ta kei nata nâ vaw deichhytuhpa zydua châta Gate angia kawpa nata reihkah pha kawpa ta maniah vaw ydy tuhpa, ei Bia zawpi zydua hnohta alynabie ei reih.
5)     Sipasapazy (Hlazy 113 : 7-8) hawhta maniah cheihchalotuhpa nata ano liata eimâ lyna (Nehemia 8: 10) vâta thatlôna ta maniah vao heihtuhpa Abeipa liana chata khâ aly ei suh u.
6)     Election achhâ hana hawhta ziza pha leipa a y pathlei khia my khai ha awpa ta Bia zawpi zydua ei châ haw ei.
7)     Siaha tawhta nâ vaw zituhpa zydua nata alyna kyhchhi avaw hlaopa zydua hnohta palôhru hmeiseihpa ta alynabie ei reih hmeiseih.


           

Palak Pilot Project Thatih

Palak Pilot Project Thâtih
~ Heili T. Azyu
Zonuam, Aizawl

( He daihti lia heta cha Palâ tah leipa ta Palak tahpa a châpa vâta nata a Project moh Palak a châ vâta nata arohtuhpa ta Palak atahna zie hawhta Palak tahpa ta palâsapa a châ. Ed )
            Kô 1973 chhâna lâta Assistant Plant Protection Officer (SDO rank) Agriculture Directorate Mizoram liata hria na ta. Kô 1975 liata Puhpa S.K. Biswas, Agriculture Director ta vaw y ta. He daihti nona he Planning Officer a hropa ama y lei vâta APPO nata Planning Officer rain a pakaohsa ta. Planning ei hria nona heta Mawrâh liata NEC Scheme 3 Zobawk Project, Kawnpui Project nata Saikhawthlir Project Agriculture Land Development Project ama raihriana dâhzy report lapakhypa ta achu tyh na ta, he Scheme he a pha chheih ha tarawpa ta lyu hneituh penawhzy ta leipalie ama pitloh thei leipa rairuna sâkha amâ tyhpa cha ama leipalie awpa ta sahroh-Plough animal ama hnei lei vâta leipalie cha tupi ta palie ta, pitloh a ru ngâsâ tahpa report zy eima dao tyh.
            He Scheme alyupâpa nah heta Chhimtuipui Area, atahmâ Siaha nata Lawngtlai District liata Palak nata Chamdur Pilot Project Land Development Programe tao hr’awpa a pha kawpa ta pahno na ta, he District hnôhkhaw penawh hmah pasiesa n’awpa ta NEC Shillong lâ Scheme pangia hra sih la, tahpa a pha ei tahna zie Director liata tlôkhei na ta. Eima Director Puhpa S.K. Biswas chhaota pha na tah khei kaw hra ta. Kô 1975 – 1976 kô thaona liata Palak Pilot Project nata Chamdur Pilot Project Land Development Scheme cha pachhuahpanoh na ta, he Scheme he roh na ta, sawhkhâlâpangia awpa ta tao pi ta, anodeikua cha Directorate Level tawhta hmo pachhuahpanoh thlâhapa cha a thatlô vei tahpa ta eima Director tan a chho ta. Chanota Development Commisioner Puhpa Lalkhama, IAS cha pahnie(Convince) awpa ta Hon’ble Deputy Speaker Puhpa Hiphei a saohiah na ta, he hmo he NEC lâpangia hra awpa ta Development Commisioner Puhpa Lalkhama, IAS he vaw chho la, anota âryh atah khiala Agriculture Directorate tawhta eima kaw tlôkhei aw tah na ta, ano (Puhpa Hiphei) chhaota nâpyhkhei ngâsâ ta, he Scheme he sawhkhâlâpangia pi ta, Mizoram sawhkhâchhaota NEC lârecommend pa ta a pangia haw. He Scheme ry liana heta lyu hneituh penawh hnohta baona assistance eima pie awpazy cha : Lyu vana, apathaina, leipaliena chhaichhi, tupi, thuatlai, leipaliena, ama leipalie chhôh ti lâi taona, leipalie paraihna, sahroh baona nata o sa baonazy ei pahlao khai.
            Cha kô 1976 April thlââliata DAO Siaha liata y awpa ta transfer pa châna ta, eima Director ta ‘ Palak nata Chamdur Pilot Project pachhuahpanoh ta raihria awpa ta nâa scheme taopa châta, nâma tlai ta na hria aw’ tahpa ta DAO Siaha heta eina soh. Agriculture Adviser, NEC Shillong – Mr. A. Bhowmik ta he scheme eima taopa he hiahhrina kaw tao hôlô kaw ta. Cha hiahhrinazy achhyta chhopasia awpa ta cha nâa cheingei na zu awpa na abyuh na tah ha ta, Siaha tawhta Aizawl lâavypa ta Director châacheipa ta NEC Adviser o lâcha ei zu. NEC Adviser ta baona hropa eima piepa hropa cha âyh ta khai thlâ ha ta, Sahroh baona nata o sa baona ei taopa cha apyhthei leipa ta. Chârasala hetana heta chhopasia na ta, sahroh leipalie awpa y leipa ta cha tupi ta alei chhiah lymâta leipalie awpa cha thei veih ei, he hena eima hlaotloh leina chhâa nata eima rairu chaina a châtyh tahpa ei reih nahta cha, “Chata a châkhiala sahroh 2 châleipa ta, 1 cha ahneituhpa ta chalei sala, 1 hropa cha nama bao aw tahpa cha âyh tah ta, miah âyhkhei ha. O sa baona deikua cha Rs.1,000/- (Tlaw sâhkhâ) scheme liata soh pi ta âyh atah vei, o cha âmo mâh tlâsa tyh ma? Khaziama nama bao aw tah ha ta. Leipalie he chavah kiah bypa râh palo kawpa liata a ypa châta, âmo khih pahrâna tawhta Km ¾ chôhnaopa ta a siepa châei ta, hâta eikha liana heta hriatuanoh leipalie pangaina ta hmâ ei ta, pachyhnoh, pahâoh hmâpa ta ama khih lâ sie heih ei ta, raihriana noh 4 ngâlâh ama hnei. Chavâta he leipalie hnei awpa ta chhôhkha(family) eimâtlyh penawh cha leipalie by su rypaohpa liata khih paduapa ei sih la, cha khih liana cha School zy, thohna o (Sub centre) zy, ama leipalie sahroh mohôhtuh awpa ta AH&Vety Aid Centre zy padua awpa ta sawhkhâhnohta tlôkheipa ta khih padua awpa taihta chhopasia na ta, O sa baona cha ama o tyhpa yna su chakuapa thyusai ta leipalie by  râh palopa la sie awpa cha ngiaroh kaw ei ta, chavâta âmo sy n’awpa ta baona he piepa châ sala tahpa ta chhopasia na ta ngiachhiena ei haw. Achhâna lâta la NEC Adviser Shillong chhaota nâpyhkhei hata, ei ly kaw. A scheme sawhkhâta miah amâ pyhkheipa ngâlâh ei lyna châ leipa ta, eima raihria chhôh zydua liata ei staff nawh sahlaozy tan a co-operate pha kaw sai ei ta. Aviapachaipa ta Puhpa Tluachho Khulia (Hiakhu paw) eina hrialâ pha ngâsâ. “A châpa cha a châ, a châ leipa cha châvei” tahpa ta a strict ngâsâpa châ ta, ama  raihriapazy ama patlô pathlah leipa cha completion certificate zy ropa khoh vei. Thokha ta “Zawzi paw hlâta chhao na a strict via” zy ama tahpâ châ ta, ano raihria âdopa nata a strict pa vâta khu leipalie ( PalâLeipalie) khu eima hlaotlohpa ta ei pahno. Atanoh chyhsa hluhpi leipalie ta niebaw atlua theipa duahmo liata eima soh hapa khu ei ly kaw.
            Kô 1976, May thlâpâ liata Palak Pilot Project mohpasia awpa ta Soil Survey of India Culcutta tawhta Soil Surveyor nawh 3 akhy ei ta, Siaha tawhta keima, Puhpa NT. Vakaw nata HC. Sado, Council Officer nahzy chhaota a su khu za chahlô pi ta, leipalie atao awpa ta chhôhkha atlyhpa (family selection) hneipâ awpa achhuhpa châ ta, chanota chhôh thokha a vaw ypa sahlaozy cha : 1. Puhpa A. Tharu – Vahia 2. Puhpa HC. Laicho – Tôkalô 3. Puhpa HC. Laihei – Tôkalô 4. Puhpa R. Sangkhuma – Tôkalô 5. Puhpa Dengrikhuma – Tôkalô 6. Puhpa Dothanga, F/O F. Lala 7. Ladova 8. Hrangluaia zy ama châ. Soil Sample zy la laih ei ta, khih padua n’awpa su Phurâ nata Maisâ suzy khu eima tlyh. Maisâ tawhta Palâ kao sao lymâpa ta Palâ nata Laty lâpi lâta eima puapahlie. Group sâo(2) lâta apachhaih pi ta, group 1 ( viahnazy yna) ta cha Masiah, leipalie liata apahrâpenawh pô 6 dua ama hmô pâ Atahmâta Maisâ khih yna kiahpâ liana khuta zâkha eimâ rie.
            He Pilot Project eima hriana chôchâ liata Agriculture Director, Puhpa S.K. Biswas heta eina châkhei ngaita kaw. Culcutta tawhta Soil Survey Party zy kaw tuah ta. Chaleipa chhao ta kô 1979 November liata  Agriculture Adviser thiehpa Dr. Kaul Shillong tawhta Mawrâh lâ akhy ta, Chamdur nata Palak Pilot Project tly awpa heta hrua ta. Siaha tawhta Pheita Lytaih, Mapi, Bôtlâ, Chamdur Project lâ sie na ta, Chamdur liata Director nata Adviser zy ei vaw hâ ei. A mo cha Aizawl tawhta Helicopter ta avy ei ta, Chamdur Project ahniana su BSF Camp New Jagnasuri liata Helicopter ta vaw tla ei ta, cha tawhta Km 5 rachhôh pheita azu ei ta, Chamdur Project ama za tly. Chamdur Project deikua he MNF râ buapa khata vâro rairuna miah tlôkhei ta, scheme eima hriana dâ khodâ hawhta châ vei. 30/40% rachhôh eima hlaotloh. Zâkha arie ei ta, kei chhao âmo pazi na ta, New Jagnasuri tawhta Tôkalô lâ Helicopter ta eima kaw pangai. Tôkalô tawhta Km 6 rachhôh Phura pheita eima za pangai heih. Viah nawh eima Director nata Adviser zy râ hmahsiepa miah ama khokhei zie nata ama tiama zie ei reithai kaw ei. PalâPilot Project cha 60/70% a hlaotlohpa hawhta eima pachâ. Phurâ liata zâkha arie pi ta, PhurâVC nata khitlâhzy ta Seih miah thiepa ei ta, Cultural Show zy pamosa ei ta, amâ ly kaw hra. A mylâa ta Tôkalô lâthlai kua heih pi ta, Helicopter ta Tôkalô tawhta Lytai, Lytai lia kei chô na ta, âmo Aizawl lâama sie haw. He he Marapa râ Agriculture hmahsiena liata ei hria thei chhôhpa a châpa ta pahno na ta ei ly kaw.

            Khu Agriculture râh phana su pangai awpa ta cha PWD nahzy chhao tlâ lâpi pakiasa ta Kiasie Khih parohpa lâ tawhta Hmâkhytlâ Phurâ pangaipa ta ama survey chiehpa panano awpa ta committee liata tlôkheipa châ ta, chanota Siaha PWD EE Puhpa Ramhluna Khiangte  chhao ta âryh tahta, Puhpa S. Pailei, EM, chanota Committee liata ahlaopa chhaota eina bao kaw. Chatawhta atahmâta a siena lâa pasiesa awpa khuta paryhsa khaipa a châ. Vahia tawhta Phurâ cleipalie pangai n’awpa khu thotlâ lâpi (IVP) tlâ châ ta, Agriculture Link road ta Vahia tawhta Phurâ pazao  awpa ta scheme tao heih pi ta, Km 10 châ ta, Rs.70,000/- ( Tâkâ Thy sari) sanction pa a châ. He link road chaona liana chhao heta Vahia khih nôpawpa nata leipalie ahneituh penawhzy ta km 1 liata Rs 7,000/- (Sâhsari)  average ta hria ei ta, eima patlô thei chyu chyuhpa a châ. He liana heta raihria na baotuhpa Puhpa Tluachhô Khulia ei reithai kaw heih. Anota tiama kawpa ta a mohôhpa nata phahnai âgiah vâa phusâ chyhpa ta ta eima patlô thei. Kô 1982 April liata Aizawl lâ transfer awpa ta order hmô na ta, ei transfer hlâta pahy h’awpa ei khohkaw tarawpa ta khodâh hawhta lâpi pha leipa ta, châhrasala tao chhyh laihpa ta la atlô thei thlâh hawna tahpa bie thei na ta, chavâta  May thlâpâ liata ei Driver St. Morry T. Azyu (L) lâpi buah kawpa lia chhao ta Motor ahao thai kawpa achhi na ta, eima 2 ta eima zu. Vahia tawhta thotaina (Ârâ ) tupi nata thuatlai nata tâkô zy acheipa ta viasa thokha ta miah zi ei ta Phurâ eima pangai. Leizaih achopazy pahâpâ laih pi ta, Phurâ khih tlô chyta avyh tho lâpi liata âpakhâpazy taipâ laihpa ta Phurâ khih eima tlô haw. Phurâ khih mo chhao aly kaw ei ta, vao tihâhzy miah ama sapa.   

REV REGINALD ARTHUR LORRAIN

REV. REGINALD ARTHUR LORRAIN

(Vaili Mahpaw)


Reginald Arthur Lorrain he Mongyuh râh (England) khihpi London liata apahrâpa nôvah James Lorrain nata Louisa Hawkins zy sawchapaw seihnai chaipa châ ta, târi noh 10th Khipa (July), 1880 liata a pihpa a châ. Unawh pathôh nata sietanô pakha a hnei.
R.A. Lorrain he School hâti a châ no tawh chhao ta a palôhru liah-mari chaipa liata alai chai tyhpa cha Amazon chyhsa nata Africa râhzohpa liata a pahrâpazy he ama châ tyh. Achuna lâ liata Witheriff Grammar School tawhta Junior Cambridge a patlô.
A vaw pitloh tawhta Pheisaih nata Cowboy raizy he a pahâhkhei chaipa châ ta, Canada nata USA râh rietheichhih kawna suzy liata kô 4 chhôh tlai vaw y ta. He daihti nota a palôhrupa liata alai chaipa cha chhâzaw hriena rarôh-y ngaitapa su liata chyhsa thysâh hluhpi pasa ama tao awpa he “Ahy a uasa hlei” tahpa bie he a châ tyh.
Kô 1902 liata a raihria tyhpa Pheisaih nata Cowboy raizy bâhsaipa ta London lâ vaw kua lilaw heih ta, arypaoh sala lâpi phapa â pahy khiahtala râhzohpa lâ sie awpa ta apalôhrupa liata pachâna chôta Mission Society py thokhazy hnohta ahawna tao ta. Châhrasala, a hlaotloh vei. A hlaotloh leipa hnabeidypa ta, London Office liata raihria ta, Missionary châ â chhuahnazy bâhsai khaipa ta, lahpinôzy hnei ta, London liata sôhdaona taopa ta khihsana paryh awpa liahsa â chhuah ha bâ.
He bietluna a tao tawhta daihti rei leita kô 1905 Hmypi (February) 11 liata Khazohpa awna ao, râhzohpa lâ sie awpa ta awna, sia ngâsâpa dao ta. Khazohpa ao a theipa cha he he a châ: “India râh chhâna liata pahrâpazy thâtih roh la, thâtihbu liata papua teh” tahpa ao a châ. A pachâna pahno tu taraw leipa ta, a palôh a hria kawpa vâta nata ao a theipa cha a pahno pasia kawpa vâta chhôhpadâhpa lâ thlai a ngia ta, Khazohpa hnohta ao a theipa cha ano Khazohpa ao tlai a châ khiahtala Bible bie tawhta pasia awpa ta thlahchhâna ta â haw. Thlah a chhâ khai tawhta Bible thlai pakai ta, Luka 10: 16-20 na châh he a pakai. He châhzy hry liata a palôh la chaipa nata hria chaipa cha, châh 16-na, 18-na nata 19-na châh zy he a châ.
Missionary châ awpa ta awna liata a sia tarawpa ta India râh khei hawhpa su lia tlaima a hria aw tahpa a pahno pasia leipa vâta a uhta Lunglei liata Baptist Missionary ta hria haipa J.H. Lorrain hnohta châ paphao ta. A uhta ta pho chichhihpa nata luh la hmâhpa, tlâh râh liata pahrâpa, ama yna su tawhta chho lâ liata pahrâpa, ‘Lakhers’ pho ama ypa thâtih nata âmo châta Lushai Krizyhpazy ta Khazohpa lâta Missionary tuapa awpa ta thlah khâ ama chhâkhei tyhpa thâtih za chho ta. He châpaphaopa a hmô tawhta cha Lakher pho hnohta Missionary ta sie awpa ta bietluna a tao haw.
Abeipa Khazohpa tawhta pasia via byuh khao leipa ta awna ao nata hriana awpa su taihta asia ngaitapa ta pahnona a hnei hapa vâta a palôhrupa ta thlachhâna chôta Mara chizy hnohta thâtihpha bie tlôkhei cheingei awpa cha khâchâ achhuahna siapa hnei ha ta. Mission Society nano nanopazy a ngâchhâ khao hlei leipa ta ano kuphei tlaita hria awpa ta a vaw patohpatia ta. Thlahchhâna chôta a chhôhkha nata viasa richâh thokhazy pahruapa ta târi noh 11th Hmypi, 1905 liata Mission Society thiehpa, “Lakher Pioneer Mission” cha London khihpi liata a vaw padua haw.
Mara râh lâ a kaw sie hlâta thohna thaina a chu awpa a peimawhpa ta a pahnopa vâta Livingstone Medical College, London liata thohna thaina kô 1 chhôh a chu heih tua ta, Diploma Course apha ngâsâpa ta a patlô. Kô 1906 Phiapi (November) noh 12 liata Maud Louise Ulander cha lahpinô ta hnei ta, târi 18th January 1907 ta England puasaipa ta India râh chhâna Mara râh cha ama novâh ta ama kaw pangai. Tilaipi chô liata noh hluhpi balyh hmâpa ta ama vaw sie khai tawhta phei ta kaw sie lymâ heih ei ta, târi 26th Thlarâh, 1907 zâlâ dawh 4:00 pm rachhôhpa liata Saikao khih amâ kaw ngia haw.
Saikao beipa Thylai Hlychho nata khihsawzy paryhsana hawhta Lakher Pioneer Mission Station cha Saikao khih liata ama vaw padua. Rev. R.A. Lorrain heta Mararâh a kaw tlô tawhta rai hluhpi hria ta, a raihria tlâhpi viapazy cha:
v  Kô 1908 liata Mara Alphabet maniah taopa ta, Siku chhao a pahypâ haw.
v  Kô 1908 Phiata pachyhnoh zâ ta Saikao beipa o laikah tawhta Mara reih ta Khazohpa bie tlâh-awna a hnei. He nota Biehrai bo nata châh â tlyhpa cha, Isai 60: 1 na “Thyula khaih teh, na khaihna cha a vaw tlô haw”tahpa bie he a châ.
v  Kô 1914 liata Mission Bungalow pha kawpa vaw padua ta, atanoh taihta aduah thlâhpa he a châ.
v  Biehrai palie ta, Biehrai Thiehpa (New Testament) he kô 1928 liata a papua thei haw.
v  Biehrai parohpa a palie hleikhô ta, Mongyuh hlazy Mara reih lâta palie ta, hlabuzy chhao a vaw papua.
v  Mararâh chhôh liata thâtihpha chho laih ta, Awnanopa apaduatuhpa a châ.
v  Pahânoh maihta Khazohpa bie achuna Sunday School avaw pathaotuhpa a châ.
v  Atlâhleipazy cha thohna hmâpa ta thlahchhâna ta a vaw mohôh lymâ tyh.
v  School liata pachu awpa Chutuana bu, Arithmetic bu, Geography bu nata a hrohriapazy chhao a vaw papua hra.
v  Mara Dictionary nata Mara Grammar a tao hleikhô ta, Khumi Dictionary, Khumi Hlabuzy chhao a vaw tao khai ha hra.
v  Kô 1921 liata a nô asatuhpa atheithlâhna châta “Louisa Lorrain Memorial Press” a padua.
v  Kô 1926 tawhta Krizyhpa Chiamie Tôna a papua pathao.
v  Ama chakaona râh-ri awpazy vaw tao khai ha ta, râh-rina liata ngiana alôzy a vaw bô laih khai ha hra.
Rev. R.A. Lorrain he Lakher Pioneer Mission Society paduapa ta Mararâh chhôh liata a chakaona raihriana kyh liata Khazohpa khihnarâh pakawhna nata British Empire châta hriatuh phapa nata ngâchhihpa a châpa vâta kô 1937 Patô (May) 12 liata “The Coronation of King George, the Sixth” daihti nona khata British Sawhkhâ ta Civil chyhsazy palyupalihna asâh kawpa a vaw hlâ tyhpa, ‘Coronation Medal’ cha Rev. R.A. Lorrain hnohta Sir Robert Reid, Assam Governor ta a vaw hlâ. 
Mararâh liata kô 36 chhôh Khazohpa chakaona rai a hria tawhta kô 64 chyhsa châpa ta târi noh 1st Hmypi (February), 1944 zâlâ dawh 4:45 pm liata a hrona zydua a pie khaipa ta a vaw chakao lymâpa Abeipa hnohta â pahâ haw. Kyhpachâ ngâsâpa ta a vaw chakaona su Mararâh leilô, Lorrain Ville, Saikao liata Abeipa â vy heihna hâpa ta a lei sapa cha pabupa a vaw châ haw.
“Abeipa ta râh thiehpa miah a piepa cha ângia kaw dia” tahpa ta lâhlapi tawhta asai ngâpa Saikao khih liata a lei sapa cha chhâzaw khihdei tita rônah ngâsâpa ta pathyu heih awpa ta paziapa a châ chy.